زي النهاردة…محمود خطاب يروي قصة صعود B.TECH في السوق المصرية واحتفالها بعيدها 27
زي النهارده من 27 سنه وفي يوم 1 يوليو 1997 كان أول يوم في حياة الشركة – وفقا لمحمود خطاب رئيس شركة بي تك على حسابة الشخصي على منصة لينكد إن- واللي ابتدت واستمرت لمده 5 سنين بأسم اوليمبيك ستورز قبل ما يتم تغيير الأسم لـ B.TECH كانت مغامره ومخاطره وتجربه جديده تماما من نوعها في الوقت ده ماكنش فيه حاجه في مصر اسمها Organised Retail ولا Chain Stores و لا تقسيط بيتم على نطاق كبير وواسع و كان المسيطر على التجاره في مصر ايامها شركات القطاع العام بنسبة تزيد عن 70 % من حجم السوق والباقي عباره عن Traditional Retail.
في البدايه الناس لما كانت بتسمع عن اللي بنحاول نعمله كان الأغلبيه متوقعين فشل التجربه في خلال فتره قصيره لأن في رأيهم من الصعب جدا وقد يكون من المستحيل تغيير طبيعة السوق وكمان المستهلك مش هيقبل الفكر الجديد فكان معظم الرأي اللي بنسمعه بلاش تضييع وقت ومجهود وفلوس في حاجه صعبه كده جزء تاني من الناس ماكنش مستوعب او فاهم الفكره واحنا بنحاول نعمل ايه وجزء بسيط كان مبسوط بالفكر الجديد وبيشجعنا عليه.
ابتدينا الرحله بـ 3 فروع في المقطم والمعادي والمهندسين وقبل نهاية السنة افتتحنا اول فرع لنا خارج القاهره في أسيوط وواحده واحده ومع مرور الأيام ابتدينا نكبر ونزيد لحد ما أثبتنا نفسنا و ربنا أكرمنا وبقينا في خلال سنوات قليله اكبر شركة في مصر في مجالنا وابتدى الفكر الجديد ينتشر وابتدى شكل تجارة التجزئه في مصر يتغير و الفكر المشابه لنا ينتشر في مجالات اخرى غير الاجهزه الكهربائيه والمنزليه وابتدينا نشوف سلاسل تجاريه في مجال الملابس والسوبر ماركت والرياضه و الصيدليات واكيد الأجهزه الكهربائيه وحاجات تانيه كتير.
وتطور شكل الشركة من اننا مجرد شركة توزيع وتجارة تجزئه لأن نكون لاعب اساسي ومؤثر في مجالات كتير زي التقسيط والأئتمان الأستهلاكي واللي ابتديناه من 27 سنه الي جانب التوزيع والتوكيلات التجاريه و الاونلاين على مستوى المستهلك وعلى المستوى التجاري من خلال منصة deelz وعلى مستوى ال B2B وكمان ال technolgy creation and development من خلال b_labs والتكنولوجيا الماليه من خلال mylo .
لما بنسترجع التاريخ ونشوف ايه اللي حصل في ال 27 سنه اللي فاتوا الحمد لله بنحس بالفخر بأن ربنا أكرمنا وقدرنا أننا مش بس نكبر وننجح انما يكون لنا تأثير ايجابي في تغيير شكل تجارة التجزئه في مصر على مدار العمر ده.
والنهارده وفي تاريخ احتفالنا بمرور 27 سنه على بداية نشاطنا بنحتفل بأفتتاح اكبر فرع لينا واكبر فرع متخصص في بيع الأجهزه الكهربائيه والألكترونيه في افريقيا كلها مش في مصر بس B.TECH MAX.
الفكره مش في المساحه انما في تجربه شرائيه جديده تماما بنقدمها للمستهلك مش بس في مصر انما في المنطقه العربيه وافريقيا نتمنى بأذن الله انها تساهم مره جديده في تغيير و تطوير شكل ومنظومه وفكر تجارة التجزئه وخدمة المستهلك.
ألف شكر لكل زميل في الشركه موجود معانا النهارده او كان موجود على مدار الـ 27 سنة الماضيه وساهم في بناء الشركه ووصولها لما نحن عليه اليوم من غير كل واحد منكم عمرنا ما كنا هنقدر نوصل للمرحله دي ولا نستمر العمر ده كله بنمو وتطوير كل سنه .
وألف شكر لكل شركائنا في النجاح ده بداية من المساهمين في الشركه اللي صدقوا فينا وفي قدرتنا على بناء كيان كبير وكل الشكر للموردين وكل عناصر المنظومه اللي بيشتغلوا معانا على تقوية الحاضر والبناء للمستقبل واكيد لكل عملائنا والملايين اللي حطوا الثقه فينا على مدار السنين واللي بنوعدهم دائما بتحسين وتطوير كل خدماتنا علشان تليق بيهم ونقدمها لهم في كل مكان في مصر وبأذن الله قريبا خارج مصر.
